काठमाडौँ ।  शुक्रबार काठमाडौँ उपत्यकामा ११ सय ७ जनामा कोरोना संक्रमण पुष्टि भएको छ । यसमध्ये ४८४ जना महिला र ६२३ जना पुरुष रहेका छन् ।

काठमाडौँ उपत्यकामा मात्र ९ हजार ६ सय ८१ जना सक्रिय कोरोना संक्रमित रहेका छन् भने भक्तपुरमा ७८३ जना र ललितपुरमा २२२८ जना संक्रमित रहेका छन् ।

पछिल्लो २४ घण्टामा थप १९४५ जनामा कोरोनाभाइरसको संक्रमण पुष्टि भएको छ । १० हजार ३४० जनाको पीसीआर परीक्षण गर्दा ७४० जना महिला र १२ सय ५ जना पुरुषमा संक्रमण पुष्टि भएको हो । नेपालमा हालसम्म २ लाख १६ हजार ९६५ जनामा संक्रमण पुष्टि भइसकेको छ ।

हाल सक्रिय संक्रमितको संख्या २४ हजार ६६५ रहेको छ । यो कूल संक्रमितको ११.४ प्रतिशत हो ।

पछिल्लो २४ घण्टाको अवधिमा ५ हजार ३६४ जना निको भएका छन् । नेपालमा निको हुने दर ८८ प्रतिशत रहेको छ । हालसम्म १ लाख ९१ हजार २ जना संक्रमणमुक्त भइसकेका छन् ।

पछिल्लो २४ घण्टामा नेपालमा २२ जनाको मृत्यु भएको छ । यो सँगै नेपालमा कोभिड–१९ बाट मृत्यु हुनेको कूल संख्या १२ सय ९८ पुगेको छ ।

हालसम्म देशका १२ जिल्लामा ५ सयभन्दा बढी संक्रमितहरु उपचाररत छन् भने मनाङ जिल्लामा संक्रमणमुक्त रहेको छ ।

हाल १९ हजार १४ जना होमआइसोलेसनमा रहेका छन् भने ४०३ आईसीयू र ६३ जना भेन्टिलेटरमा छन् ।