काठमाडौँ ।। गृहमन्त्री रवि लामिछानेको निर्देशनमा प्रहरीले सुन प्रकरणमा संलग्न भएका व्यक्तिहरुलाई पक्राउ गर्न थालेका छन् । शुक्रबार साझ सुन तस्करी प्रकरणमा मुछिएपछि पूर्वउपराष्ट्रपति नन्द किशोर पुनका छोरा दिपेश पुनलाई प्रहरीले पक्राउ गरेका छन् ।

दिपेश पुनलाई काठमाडौँको टोखाबाट पक्राउ गरेका हुन् । प्रहरी प्रधान कार्यालय, नक्सालबाट खटिएको टोलीले सत्तारुढ माओवादी केन्द्रको विद्यार्थी संगठन अनेरास्ववियु क्रान्तिकारीका महासचिव समेत रहेका उनलाई पक्राउ गरेको हो ।

२ साउनमा बरामद ६० किलो सुन तस्करी प्रकरणका मुख्य आरोपी दावा छिरिङसँग उनको सम्बन्ध देखिएपछि पुन छानबिनको दायरामा परेका थिए । तर, सीआईबीले गम्भीरतापूर्वक अनुसन्धान नगरी उनलाई उन्मुक्ति दिएको सुन जाँचबुझ आयोगको प्रतिवेदनमा पनि उल्लेख छ ।

सुनसम्बन्धी जाँच आयोगले पनि बिहीबार बुझाएको प्रतिवेदनमा पुनविरुद्ध अनुसन्धान नगरी सीआईबीले उन्मुक्ति दिएको निष्कर्ष निकालेको थियो । सुन प्रकरणमा पुर्पक्षका लागि थुनामा रहेका दावा छिरिङसँग दिपेशको बाक्लो उठबस रहेको भेटिएको थियो ।