काठमाडौं । इन्डोनेसियाको पूर्वी क्षेत्रमा शनिबार बिहान गएको शक्तिशाली भूकम्पमा परी कम्तीमा २० जनाको मृत्यु भएको छ भने ६ जना घाइते भएका छन्। भूकम्पपछि आएको पहिरोमा दुई जना बेपत्ता रहेको अन्तर्राष्ट्रिय सञ्चारमाध्यमहरूले जनाएका छन्।

शनिबार बिहान फ्लोरेस क्षेत्रको तट नजिक ७.७ म्याग्निच्युडको भूकम्प गएको हो। भूकम्पको केन्द्र समुद्रमा रहेको र जमिनको सतहबाट करिब १० देखि १५ किलोमिटर गहिराइमा रहेको बताइएको छ। भूकम्पको शक्तिशाली धक्का फ्लोरेससहित आसपासका क्षेत्रमा समेत महसुस गरिएको थियो।

भूकम्पका कारण घर तथा विभिन्न भवनहरू भत्किएका छन्। सडकमा पहिरो जाँदा उद्धार तथा राहत कार्यमा समेत कठिनाइ भएको जनाइएको छ। विद्युत् आपूर्ति र सञ्चार सेवामा अवरोध हुँदा प्रभावित क्षेत्रको अवस्थाबारे जानकारी संकलन गर्न पनि समस्या भइरहेको अधिकारीहरूले बताएका छन्।

भूकम्पपछि करिब २ हजार मानिसलाई सुरक्षित स्थानतर्फ सारिएको बताइएको छ। नगेकेओ क्षेत्रमा घर, गोदाम तथा सरकारी भवनहरूमा क्षति पुगेको छ। अस्पतालहरूबाट समेत बिरामीलाई सुरक्षित स्थानमा सारेर उपचार सेवा सञ्चालन गरिएको रिपोर्टमा उल्लेख छ।

भूकम्पपछि इन्डोनेसियाको मौसम तथा भूगर्भ निकाय (BMKG) ले सुनामीको चेतावनी जारी गरेको थियो। तर समुद्री सतहमा ठूलो जोखिम देखिएपछि सुनामी चेतावनी पछि हटाइएको छ। BMKG ले स्थानीय समयअनुसार बिहान ७ः३० बजे सुनामीसम्बन्धी प्रारम्भिक चेतावनी समाप्त गरेको जनाएको छ।

भूकम्पपछि शक्तिशाली परकम्पहरू समेत गएका छन्। उद्धार टोलीले भत्किएका संरचनामा फसेका मानिसको खोजी गरिरहेको छ। प्रभावित क्षेत्रमा सडक अवरुद्ध, सञ्चार तथा विद्युत् सेवामा समस्या रहेकाले क्षतिको पूर्ण विवरण संकलन हुन अझै समय लाग्ने अधिकारीहरूले बताएका छन्।

उद्धार तथा राहत कार्य जारी रहेकाले मृतक र घाइतेको संख्या अझै बढ्न सक्ने आशंका गरिएको छ। अधिकारीहरूले प्रभावित क्षेत्रमा सर्वसाधारणलाई सतर्क रहन आग्रह गरेका छन्।